राजकीय वर्तुळात खळबळ: येत्या २३ जानेवारीला मोठा राजकीय भूकंप होणार, शिवसेनेच्या नेत्याचा दावा
राजकीय वर्तुळातून एक मोठी बातमी समोर आली आहे. येत्या २३ जानेवारीला राज्यात मोठा राजकीय भूकंप होईल, असा दावा शिवसेनेतील एका बड्या नेत्याने केला आहे. शिवसेना नेते राहुल शेवाळे यांनी काँग्रेसचे आणि ठाकरे गटाचे आमदार आमच्या संपर्कात असल्याचे सांगितले आहे.
राहुल शेवाळे यांनी म्हटले, “२३ जानेवारीला एक मोठा स्फोट होईल आणि राजकीय भूकंप होईल. त्यामुळे आपल्या पक्षाचे अस्तित्व टिकवण्यासाठी विजय वडेट्टीवार आणि संजय राऊत अशा प्रकारच्या बातम्या पसरवत आहेत.” त्यांनी असा दावा केला की काँग्रेसचे व ठाकरे गटाचे १० ते १५ आमदार शिवसेनेत प्रवेश करण्यास इच्छुक आहेत, ज्यामुळे त्यांच्या पक्षात फूट पडण्याची शक्यता आहे. त्यांनी विरोधकांना स्वतःच्या पक्षावर लक्ष केंद्रित करण्याचा सल्लाही दिला.
याच दरम्यान, संजय राऊत यांनी खळबळजनक दावा केला की, देवेंद्र फडणवीस यांच्या मुख्यमंत्रीपदाच्या शपथविधीपूर्वीच शिंदे गटात मोठी फूट पडण्याची शक्यता होती. उदय सामंत हे शिंदे गटापासून वेगळे होण्याच्या तयारीत होते आणि त्यांच्यासोबत २० आमदार होते. भाजपचा प्लॅन उदय सामंत यांना पुढे करून सरकार बनवण्याचा होता, असे राऊत यांनी म्हटले.
तसेच, विजय वडेट्टीवार यांनी खळबळजनक विधान करत, “उद्धव ठाकरेंना संपवल्यानंतर आता एकनाथ शिंदेंना संपवून नवीन ‘उदय’ पुढे आणला जाईल,” असे सांगितले. या वक्तव्यांमुळे राज्याच्या राजकीय वर्तुळात तुफान चर्चा सुरू आहे.
